దేవరుప్పుల మండల కేంద్రంలోని శ్రీ ముత్యాలమ్మ అమ్మవారి బోనాల మహోత్సవం భక్తిశ్రద్ధల మధ్య అత్యంత వైభవంగా జరిగింది. ఈ సందర్భంగా పాలకుర్తి శాసన సభ్యురాలు శ్రీమతి మామిడాల యశస్విని రెడ్డి గారు బోనాల వేడుకల్లో పాల్గొని సంప్రదాయబద్ధంగా బోనం ఎత్తి అమ్మవారికి సమర్పించారు. స్థానిక మహిళలు, భక్తులతో కలిసి అమ్మవారి జాతరలో పాల్గొన్న ఎమ్మెల్యేకు గ్రామ ప్రజలు ఘన స్వాగతం పలికారు.
ముందుగా ఆలయానికి చేరుకున్న ఎమ్మెల్యే యశస్విని రెడ్డి ముత్యాలమ్మ అమ్మవారిని దర్శించుకుని ప్రత్యేక పూజలు నిర్వహించారు. అనంతరం తలపై బోనం ఎత్తుకుని ఆలయ ప్రాంగణానికి చేరుకొని అమ్మవారికి మొక్కులు చెల్లించారు. ఈ సందర్భంగా ఆలయంలో వేదపండితులు ప్రత్యేక ఆశీర్వచనాలు అందించగా, అమ్మవారి తీర్థప్రసాదాలను ఎమ్మెల్యే స్వీకరించారు.
ఈ సందర్భంగా ఎమ్మెల్యే యశస్విని రెడ్డి మాట్లాడుతూ.. తెలంగాణ సంస్కృతి, సంప్రదాయాలకు ప్రతీకగా నిలిచే బోనాల పండుగ ప్రతి ఇంట సుఖశాంతులు, ఆయురారోగ్యాలు, ఐశ్వర్యాలను తీసుకురావాలని ముత్యాలమ్మ తల్లిని ప్రార్థించినట్లు తెలిపారు. దేవరుప్పుల మండల ప్రజలందరూ ఆనందంగా, ఆరోగ్యంగా ఉండాలని, రైతులకు మంచి వర్షాలు కురిసి పంటలు సమృద్ధిగా పండాలని అమ్మవారిని వేడుకున్నట్లు పేర్కొన్నారు.
బోనాల ఉత్సవాల్లో మహిళలు పెద్ద సంఖ్యలో పాల్గొని అమ్మవారికి బోనాలు సమర్పించగా, డప్పు చప్పుళ్లు, పోతరాజుల విన్యాసాలు, సాంప్రదాయ కళారూపాల మధ్య జాతర ఉత్సాహంగా కొనసాగింది. ఎమ్మెల్యే యశస్విని రెడ్డి భక్తులను పలకరించి బోనాల పండుగ శుభాకాంక్షలు తెలియజేశారు.
ఈ కార్యక్రమంలో స్థానిక ప్రజాప్రతినిధులు, కాంగ్రెస్ పార్టీ నాయకులు, కార్యకర్తలు, ఆలయ కమిటీ సభ్యులు, మహిళలు, యువకులు మరియు పెద్ద సంఖ్యలో భక్తులు పాల్గొన్నారు.
About the Author
